Monophonic lai. Musical item No. 1 of Le Remède de Fortune.
Sources: Machaut Manuscripts A B C E & F
Qui n'aroit autre deport
En amer
Fors dous Penser
Et Souvenir
Avec l'Espoir de jïr,
S'aroit il tort,
Se le port
D'autre confort
Voloit rouver;
Car pour un cuer saouler
Et soustenir
Plus querir
Ne doit merir
Qui aimme fort.
Encor y a maint ressort:
Ramembrer,
Ymaginer
En dous plaisir
Sa dame vëoir, oïr,
Son gentil port,
Le recort
Dou bien qui sort
De son parler
Et de son dous regarder,
Dont l'entrouvrir
Puet garir
Et garentir
Amant de mort.
Et qui vorroit plus souhaidier,
Je n'os cuidier
Si fol cuidier
Que cils aimme de cuer entier
Qui de tels biens n'a souffissance;
Car qui plus quiert, il vuet trichier,
S'Amours tant chier
L'a que fichier
Deigne par l'euil de son archier
En son cuer d'eaus la congnoissance.
Et pour c'endengrée
S'est Douce Pensée
En mon cuer et enfermée
Qu'adès me souvient
De la desirée,
Dont ma joie est née
Et l'esperance doublée
Que de li me vient.
Mais quant je voy
Le trés bel arroy
Simple et coy,
Sans desroy,
De son corps, le gai,
Et que je l'oy
Parler sans effroy,
Par ma foy,
Si m'esjoy
Que toute joie ay.
Et se par Desir recueil
Aucun grief, pas ne m'en dueil,
Car son trés dous riant oueil
Tout adoucist
Le grief qui de Desir ist;
Si me plaist et abelist
Tant qu'au porter me delist,
Plus que ne sueil.
Fors tant, qu'en aucune maniere
Ma dame chiere,
Qui de mon cuer la tresoriere
Est et portiere,
Sceüst qu'elle est m'amour premiere
Et darreniere.
Et plus l'aim qu'autrui ne mon bien,
Nom pas d'amour veinne et legiere,
Mais si entiere,
Que mieus ameroie estre en biere
Qu'a parsonniere
Fust, n'en moy pensée doubliere.
Tels tousdis iere,
Comment qu'elle n'en sache rien.
Si n'est voie
Qui m'avoie
Comment descouvrir li doie
Par nul tour;
Car sans retour
Je morroie
Se j'avoie
Refus, et se je vivoie
Ma baudour
Seroit tristour.
Dont la bonne et belle,
Comment sara elle
Que de li vëoir
En mon cuer s'ostelle
Une amour nouvelle
Qui me renouvelle
Et me fait avoir
Joieuse nouvelle,
De quoy l'estincelle
Fait sous la mamelle
Mon fin cuer ardoir?
S'en frit et sautelle,
Que homs ne damoiselle,
Dame ne pucelle,
Ne le puet savoir,
Si le port et selle.
Amours que j'en pri,
Qui volt et souffri
Qu'a li, sans detri,
Quant premiers la vi, m'offri,
Li porra bien dire
Que pour s'amour fri
Sans plainte et sans cri,
Et qu'a li m'ottri,
Comme au plus trés noble tri
Que peüsse eslire,
Car ensement
Vueil liement,
Joliement
Et gaiement,
En ma dame amer loyaument
User toute ma vie
Si franchement,
Que vraiement,
Se j'ay tourment,
Aligement
N'en vueil, fors souffrir humblement
Ma douce maladie.
Car comment que Desirs m'assaille
Et me face mainte bataille
Et poingne de l'amoureus dart,
Qui souvent d'estoc et de taille
Celeement mon cuer detaille,
Certes bien en vain se travaille,
Car tous garist son dous regart
Et pour ce, sans nul descort,
Endurer
Vueil et celer
L'ardant desir
Qui vuet ma joie amenrir
Par soutil sort;
Si le port
Sans desconfort
Et vueil porter;
Car s'il fait mon cuer trambler,
Taindre et palir,
Et fremir,
A bien souffrir
Dou tout m'acort.
Il me fait par son enort
Honnourer,
Servir, doubter,
Et oubeïr
Ma dame et li tant chierir
Qu'en son effort
Me deport,
Quant il me mort
Et vuet grever,
Mais qu'a li vueille penser
Qu'aim et desir
Sans partir,
Ne repentir;
La me confort.
Adès COF 7078
[LPx3]
L'art musical et poétique de Guillaume de Machaut - Motets
/ Ballades / Virelays - Le Remède de Fortune - Le Veoir
Dit
Ensemble Guillaume de Machaut de Paris - Guy Robert / Jean Belliard
Rec.: 1975-1977
Alvarès C 499 (LP)
Machaut - Le Remède de Fortune
Ensemble Guillaume de Machaut de Paris - Guy Robert / Jean Belliard
Rec.: 1975
Blue Heron 1012 [CD]
Machaut: Remede de Fortune
Blue Heron - Scott Metcalfe / Les Délices - Debra Nagy
Rec.: 2019
Eloquentia EL0918 [CDx2]
Guillaume de Machaut: Le Remède de Fortune
Marc Mauillon, Pierre Hamon et al.
Rec.: 2008
Eloquentia 2160 [CDx4]
Guillaume de Machaut
Marc Mauillon, et al.
Rel.: 2022
Hyperion 68318
Machaut: Remede de Fortune
Orlando Consort
Rec.: 2021
The Medieval Lyric
[CDx5]
The Medieval Lyric
Margaret Switten and Robert Eisenstein, dirs.
Rec.: 1987
New Albion 068
Remède de Fortune
Ensemble Project Ars Nova
Rec.: 1993
Unicorn-Kanchana DKPCD 9160
John Harle's Saxophone Songbook
John Harle, John Lenehan, Simon Haram, et al.
Rec.: 1995 or prior
Please see the Machaut index page for an introduction, discussion of methodology, and notes on this project.
Pierre-F. Roberge Todd M. McComb